García Nieto foi quizais, o meu mellor amigo no campo da literatura. Eramos moi diferentes de carácter, é posible que complementarios, e por iso estivemos tan unidos. Palabras de CJC á prensa, o día da morte de José García Nieto.
A amizade que uniu a Camilo José Cela e José García Nieto comezou nos anos corenta, cando ámbolos dous escritores frecuentaban o faladoiro literario do Café Gijón, e mantívose ó longo dos anos, tanto afectivamente como a nivel profesional. O legado de José García Nieto que se conserva na Fundación inclúe obra editada, manuscritos, conferencias, artigos xornalísticos, así como diferentes premios e diplomas, incluíndo o premio Nacional de Literatura, en 1951 –pola súa obra Tregua– e 1957 –por Geografía es amor– e o Cervantes, concedido en 1996.
Este legado é o segundo en importancia despois do legado do premio Nobel padronés, xa que nel atópase, sen dúbida, unha das coleccións máis importantes de poesía española de posguerra.
Fundación Pública Galega Camilo José Cela 