Conmemoración dos 30 anos da concesión do Premio Nobel a Camilo José Cela

• 

O 19 de outubro de 1989 a Academia Sueca emitiu o fallo do premio Nobel de Literatura: concedíaselle a un escritor español e galego, Camilo José Cela. O 10 de decembro dese ano o novelista padronés recolleu a distinción de mans da S.M o Rei de Suecia. Ambas efemérides constituirán o inicio e o final do programa conmemorativo no que a Fundación Cela abrirá as súas portas á literatura e á lembranza.

Este sábado, 19 de outubro, celebraráse na sede de Iria Flavia unha actividade gratuíta dirixida a tódolos públicos baixo o título Maxia e Ciencia na casa dun premio Nobel ¿de Literatura? no salón de actos do Museo, en horario de 10.00 a 12.00 h.

Doutra banda, lanzaráse en redes sociais a campaña #CelaEmáisEu coa que se pretende recuperar a memoria viva do escritor. Mediante a recopilación a través dos canles da Fundación en Facebook, Twitter, Youtube e no correo electrónico iriaflavia@fundacioncela.com, calquera que coñecera ao escritor en persoa poderá enviar á institución as súas fotos, vídeos, anécdotas ou lembranzas.

Encontro de escritores

No mes de novembro, entre o 18 e o 20, terá lugar a cita Máis de 20 anos despois. III Encontro de Escritores en Iria Flavia que, baixo a dirección de Care Santos, volverá reunir a unha trintena de escritores aos que Cela xuntou por primeira vez en 1998 e que, a día de hoxe, son grandes figuras do panorama literario español. Autores como a propia Care Santos, Juan Manuel de Prada, Lorenzo Silva, Ángela Vallvey, Óscar Esquivias, Blanca Riestra, entre outros, acudirán a Padrón a debater sobre a situación actual do sector editorial e dos seus novos retos e dificultades.

Ademáis, de novembro a febreiro terán lugar, un venres pola tarde de cada mes, e coa colaboración de Javier Pintor, as xornadas Tardes de Libros nos #30AnosNobelCela nas que se presentarán no paraninfo do Museo catro novedades editoriais en galego e en castelán coa participación de cada un dos seus autores.

Legado documental online

Tamén en novembro presentarase o portal específico da Fundación realizado en colaboración coa Biblioteca Virtual Miguel de Cervantes, que contén parte do Arquivo dixital da institución e que culmina un dos traballos de condensación e posta a disposición na rede dunha selección do inxente legado documental –doado gratuítamente polo escritor a tódolos galegos– comezado xa no ano do seu Centenario.

O 10 de decembro, ademáis do acto institucional en homenaxe ao escritor, presentarase en Iria Flavia a nova páxina web da Fundación, e o Acto homenaxe do pobo de Padrón en lembranza de cómo toda una vila acompañou ao único Nobel galego, co que se pretende rememorar, dun xeito emotivo, a aqueles padroneses que estiveron co escritor en Estocolmo e a cantos viviron ese momento de gran alegría desde a propia vila de Padrón.

A mediados de decembro, finalmente, celebrarase unha xornada, en colaboración coa Universidade Camilo José Cela, para conmemorar os 50 anos da publicación dunha das novelas que os expertos inclúen entre as máis importantes do escritor, San Camilo 1936. A xornada contará coa presenza de Adolfo Sotelo Vázquez, catedrático de Literatura Española da Universidade de Barcelona, e Dolores Troncoso Durán, Catedrática de Literatura Española da Universidade de Vigo.

Obradoiros educativos e rutas literarias

A Fundación manterá durante estes meses a súa programación educativa coas visitas dinamizadas, as rutas literarias, as valixas didácticas e os obradoiros educativos ao Museo Camilo José Cela, onde escolares e visitantes poderán apreciar a última doazón realizada á institución por unha das familias máis destacadas de Padrón (un retrato de Cela feito polo pintor Manuel Beiró). Do mesmo xeito, poderán gozar na sala específica do premio Nobel de múltiples anécdotas relacionadas con ese fito: a carta oficial da súa concesión, a resposta de Cela á Academia Sueca, parte da vaixela que se empregou na cea de gala ou a medalla e o diploma que reciben os galardoados.

Tamén mantense a entrada conxunta coa Fundación Rosalía de Castro pola que todos os visitantes que pasen primeiro pola casa da poeta poderán visitar despois o Museo do novelistade forma gratuíta.

Para finalizar, a Fundación participará cun préstamo de fondos na exposición Primores do múltiplo: Encadernación e coleccionismo na Biblioteca de Galicia, exposición que terá lugar na Biblioteca de Galicia de mediados de novembro de 2019 a xuño de 2020.

“Maxia e ciencia na casa dun premio Nobel ¿de Literatura?” 30 anos da concesión do Nobel a Camilo José Cela

O vindeiro sábado, 19 de outubro, cómprense 30 anos da concesión do Premio Nobel de Literatura a Camilo José Cela. Queres celebralo con nós? Temos maxia e ciencia da man de Arenaria Coordinación, S.L.: a entrada é para tódolos públicos e totalmente gratuíta.

Con esta actividade comezamos unha extensa programación con actividades de todo tipo que moi pronto daremos a coñecer, estade atentos!

Padrón Literario 2019

Por segundo ano consecutivo, o Concello de Padrón, a Fundación Pública Camilo José Cela e a Fundación Rosalía de Castro únense para a celebración de Padrón Literario durante todo o mes de maio.

Actuacións musicais, rutas literarias, obradoiros, etc., en Padrón Literario caben toda unha amalgama de actividades para celebrar un mes especial para as Letras Galegas e tambén para esta Fundación, xa que se conmemora o aniversario do nacemento de Camilo José Cela (11 de maio de 1916), o Día das Letras Galegas (17 de maio) e o Día Internacional dos Museos coa programación anual do Letreseo, na que o Museo Camilo José Cela abrirá as súas portas de xeito gratuíto (salvo visitas guiadas).

Ademáis, neste ano 2019, a Fundación celebra que, fai 30 años, a Academia Sueca concedeulle a un galego o premio Nobel de Literatura #30AnosNobelCela, motivo polo que comerciantes e hostaleiros da vila participarán coa Fundación en distintas actividades e promocións durante todo Padrón Literario.

Para acceder á programación completa, accede á web http://terrasdeiria.com/eventos/

Inauguración da exposición “Proxecto Libertas”

Onte tivo lugar en Iria Flavia a inauguración da exposición “Proxecto Libertas”, unha mostra organizada polo Centro PEN Galicia e o Instituto de Mediación Educativa de Ribeira (IMER), e coa colaboración da Fundación Pública Galega Camilo José Cela, do Concello de Padrón, do IES Macías o Namorado e da Consellería de Cultura y Turismo.

A exposición, que permanecerá aberta na Fundación ata o vindeiro 2 de marzo en horario de martes a sábados, de 10.00 a 14.00 h. e de 16.00 a 19.00 h., pretende reivindicar, a través da expresión artística, da obra e da palabra, que “os valores democráticos son un imperativo ético que se constrúe, e que a paz se conquista”, en palabras de Olegario Sampedro, presidente do IMER e autor das obras expostas.

Esta mostra irá acompañada de visitas guiadas polo propio Olegario Sampedro os días 1 y 15 de febreiro e 1 de marzo ás 17.00 h. Por outra parte, tamén conta cunha ampla proposta didáctica organizada polo Centro PEN de Galicia e o IMER, a cal abordará temáticas como a represión nas artes, o machismo e o fomento da diversidade. Esta proposta didáctica está dirixida a alumnos de ESO e Bacharelato e terá lugar tódolos venres de febreiro e o 1 de marzo polas mañás.

Para máis información sobre as visitas guiadas e/ou a proposta guiada, pode pinchar o seguinte enlace: Horarios e tarifas

Comezan os actos conmemorativos do 30 aniversario do Premio Nobel a CJC, #30AñosNobelCJC, coa colaboración da Fundación Rosalía de Castro

Enmarcado nos actos conmemorativos do 30 aniversario da concesión do Premio Nobel ao escritor padronés (1989), a Fundación Pública Galega Camilo José Cela chegou a un acordo de colaboración coa tamén padronesa Fundación Rosalía de Castro mediante o cal todos os visitantes que acudan á Casa da Matanza durante este 2019 recibirán unha entrada gratuíta para coñecer o Museo do Premio Nobel galego.

Con esta colaboración estréitase a vinculación entre ambas institucións, non só referentes na comarca, senón tamén xestoras de Casas-Museo recoñecidas a nivel nacional e internacional.

Nota importante: Dentro desta entrada gratuíta non se inclúe o servizo de visitas guiadas, que deberá aboarse aparte cos prezos que se reflicten no apartado de “Visitas”.

A Fundación Cela, a Xunta de Galicia e o Concello de Padrón impulsan a primeira ruta arredor da obra Del Miño al Bidasoa

O pasado 21 de setembro o Conselleiro de Cultura, Educación e Ordenación Universitaria, Román Rodríguez, e o alcalde de Padrón, Antonio Fernández Angueira, realizaron, canda un grupo de sesenta alumnos dos institutos “Camilo José Cela” e “Macías o namorado” deste concello coruñés, o percorrido inaugural da ruta “Del Miño al Bidasoa” co gallo de conmemorar o célebre libro de viaxes do Premio Nobel galego. Previamente, o alumnado participou nunha visita guiada ao renovado museo da Fundación Camilo José Cela.

Román Rodríguez explicou que con esta iniciativa “poñemos en marcha a primeira das rutas literarias relacionadas con este emblemático texto”. E concluíu afirmando que este é “un proxecto novidoso” que axudará á promoción e difusión da obra de Cela, “especialmente dos seus libros de viaxes”.

Seis escenarios de Del Miño al Bidasoa

A ruta dentro do concello padronés sinaliza seis lugares presentes na antedita obra. Nestas placas reprodúcense fragmentos que Cela empregou para describir ou referenciar cada un dos espazos. Desde a entrada en Padrón, pasando pola Taberna do Cuco, o Xardín Botánico, a Igrexa de Santiago e a Casa do escritor Nicasio Pajares, até chegar ao Cemiterio de Adina, onde precisamente repousan os restos de Cela. Neste traxecto percórrense preto de tres quilómetros por importantes escenarios biográficos e literarios do escritor galego.

Desde a Consellería de Cultura e a Fundación Pública Galega Camilo José Cela estase a traballar para que esta iniciativa poida ser extrapolada aos máis de 30 concellos galegos que aparecen no libro e que abranguen desde As Neves (Pontevedra) até Ribadeo (Lugo). Na actualidade, xa está previsto promover rutas similares na contorna de Santiago de Compostela, de Ourense, A Coruña e Ribadeo.

V EDICIÓN DO “LETRESEO. A SEMANA DAS LETRAS NO MUSEO”

A Fundación Pública Galega Camilo José Cela celebra a V edición do Letreseo co que conmemora tres datas fundamentais para a institución: o aniversario do nacemento do escritor (11 de maio), o Día das Letras Galegas (17 de maio) e o Día Internacional dos Museos (18 de maio).

Para celebrar esta “Semana de las Letras en el Museo” levaranse a cabo varias actividades gratuítas e con entrada libre que se poden consultar no seguinte enlace: PADRÓN LITERARIO

Ademais, desde o venres 11 de maio e ata o sábado 19 de maio (ámbolos dous inclusive) haberá xornada de portas abertas, de xeito que a entrada ao Museo e o servizo de guía serán gratuítos calquera día desa semana (os visitantes disporán do servizo de guía ás 12.00 e ás 17.00 h.).

Soamente se require inscrición previa para a visita teatralizada do día 19 de maio co actor Suso Martínez, no correo electrónico visitas@fundacioncela.com ou no número de teléfono 981-81.24.25.

Renovación do proxecto museográfico e reapertura do Museo Ferrocarrileiro en Iria Flavia

Prezados amigos,

Nos próximos meses procederemos a renovar o noso proxecto museográfico e reabriremos o Museo Ferrocarrileiro “John Trulock”. Con estes traballos o Museo Camilo José Cela permanecerá pechado pero se tendes visitas concertadas para os próximos meses, informarvos de que estas manteranse nas datas previstas.

Deixámosvos Nota de prensa enviada a medios con máis información ao respecto:

 

A Fundación Cela renovará o proxecto museográfico e reabrirá o Museo Ferrocarrileiro nas súas instalacións de Iria Flavia

Estes traballos de redefinición e mellora comezarán a vindeira semana e durarán ao redor de seis meses durante os cales o Museo Camilo José Cela estará pechado ao público
Santiago, 2 de xuño de 2017

A Fundación Pública Galega Camilo José Cela reorganizará e renovará o proxecto museográfico e reabrirá o Museo ferrocarrileiro ‘John Trulock’ nas súas instalacións de Iria Flavia. En concreto, para recuperar a memoria da primeira liña ferroviaria galega acondicionaranse as dúas salas do Museo Camilo José Cela dedicadas a Viaje a la Alcarria. Estes traballos de redefinición e mellora durarán preto de seis meses durante os cales o Museo dedicado ao autor padronés estará pechado ao público.

Esta medida está vinculada co acordo asinado en maio de 2016 entre a Fundación e o fillo do Nobel, Camilo José Cela Conde, para a execución da sentenza por dereitos de lexítima do mesmo, polo que se lle entrega a Casa nº 8 –onde se sitúa o Museo Ferrocarrileiro ‘John Trulock’– e un total de vinte unha obras de arte.

Así a todo, por acordo das partes, a entrega do material referido no acordo adiábase por un prazo de dez anos, podendo Camilo José Cela Conde solicitar a súa recuperación en calquera momento. Durante este período os bens permanecerían na Fundación co propósito de que se puideran destinar ao cumprimento dos fins fundacionais.

Recentemente, o propio Cela Conde solicitou á Administración autonómica a entrega inmediata dos bens que por lei lle corresponden e desde a Xunta procedeuse a cumprir co acordado. Cómpre aclarar que estas obras de arte, se ben teñen un alto valor patrimonial, non afectan á integridade da colección nin a ningún dos aspectos claves do proxecto museístico no referente ao o legado intelectual, literario, cultural e humano de Camilo José Cela.

Novo convenio con Ferrocarriles Españoles
Na mesma liña, e para non perder unha instalación museística moi querida na comarca, a Fundación Pública Galega Camilo José Cela ven de negociar un novo Convenio coa Fundación de Ferrocarriles Españoles para a integración da meirande parte dos fondos ferroviarios que se atopan no Museo Ferrocarrilero “John Trulock” dentro do propio Museo Camilo José Cela que tamén xestiona á entidade.

Con esta medida a Fundación Pública cumpre, a súa vez, cunha reclamación histórica do Concello de Padrón e integrará dentro do Museo Camilo José Cela un espazo específico no que dar a coñecer a historia do ferrocarril en Galicia moi vinculada tanto á vila que veu nacer ao escritor coma á figura do avó de Camilo José Cela, John Trulock.

A entidade aproveitará esta oportunidade para remodelar e mellorar o percorrido museográfico de Iria Flavia –unha vez rematados os actos conmemorativos do Centenario do nacemento do premio Nobel– modernizando tanto o continente coma o contido do Museo, adaptándoo aos novos públicos, permitindo a visita libre e fomentando o uso das novas tecnoloxías, o que permitirá un novo achegamento á figura do escritor cen anos despois do seu nacemento. En concreto, estas actuacións permitirán renovar o sistema de seguridade das distintas salas e espazos expositivos e eliminar as humidades presentes en diversas salas.

Para a realización de todos estes traballos a entidade padronesa pechará ás súas portas a partires da semana que vén e prevé a apertura das súas novas instalacións de cara a finais deste ano 2017.

A exposición “CJC. O Centenario dun Nobel” na Cidade da Cultura

Fotografía: Manuel G. Vicente. Fundación Cidade da Cultura de Galicia

Dende este sábado, 19 de novembro, e ata o 19 de febreiro de 2017, a exposición “Camilo José Cela (1916-2016). O Centenario dun Nobel. Un libro e toda a soidade” chega de terras madrileñas para recalar na Cidade da Cultura no compostelán Monte Gaiás.

A mostra ofrece un percorrido pola vida do escritor galego a través de 600 pezas organizadas cronolóxicamente en 44 seccións. Manuscritos, primeiras edicións das súas novelas máis importantes, obxectos persoais, fragmentos de películas nas que participou como actor, recoñecementos e pezas artísticas axudarán a entender a complexidade dunha das figuras máis extraordinarias do século XX. Sen esquecer a presenza dos tres premios literarios máis salientables cos que foi galardoado Camilo José Cela: o Nobel, o Cervantes e o Princesa de Asturias.

Fotografía: Manuel G. Vicente. Fundación Cidade da Cultura de Galicia

As múltiples facetas do hombre poliédrico que era Camilo José Cela poden rastrexarse de forma clara a través do percorrido expositivo: novelista, dramaturgo, poeta, viaxeiro, académico, editor, pintor, coleccionista, actor… Un personaxe complexo que tivo unha vida intensa nun momento da historia de España caracterizado polos continuos tropezos dos que saía airoso unhas veces, e un pouco trasquilado outras. E é que en España “O que resiste, gaña”.

A exposición, organizada pola Fundación Pública Galega Camilo José Cela, a Fundación Cidade da Cultura de Galicia e Acción Cultural Española, poderáse visitar de martes a domingo, en horario de 10 a 20 h.

A exposición “Compañías convenientes” viaxa a Santiago de Compostela

Dende o 2 de novembro de 2016 e ata o 15 de xaneiro de 2017, na sede de Afundación en Santiago de Compostela, os visitantes poderán ve-la exposición “Compañías convenientes. Diálogos contemporáneos co home poliedro”, mostra que nos acompañou en Iria Flavia durante todo este verán e que se enmarca dentro dos actos do Centenario do nacemento de Camilo José Cela.

A exposición, comisariada por Paula Cabaleiro e coa asistencia de Íñigo Rodríguez, recolle os traballos de doce artistas contemporáneos que renden homenaxe ao escritor de Padrón a través da interacción das súas pezas con algunhas das obras pertencentes ao legado celiano conservado en Iria Flavia.

Tomando como base a definición de Camilo José Cela “Eu creo que o individuo non é xamais un plano, senon un poliedro”, estes artistas achegáronse á colección de Cela a través da fotografía, a pintura, a escultura, o debuxo, o gravado, a instalación e a vídeocreación para ofrecer unha nova ollada sobre o heteroxéneo universo do escritor padronés.

A exposición poderase visitar na sede Afundación, na compostelana Rúa do Vilar, en horario de luns a domingo, de 12.00 a 14.00 e de 17.00 a 21.00 h.