A Fundación Cela, a Xunta de Galicia e o Concello de Padrón impulsan a primeira ruta arredor da obra Del Miño al Bidasoa

O pasado 21 de setembro o Conselleiro de Cultura, Educación e Ordenación Universitaria, Román Rodríguez, e o alcalde de Padrón, Antonio Fernández Angueira, realizaron, canda un grupo de sesenta alumnos dos institutos “Camilo José Cela” e “Macías o namorado” deste concello coruñés, o percorrido inaugural da ruta “Del Miño al Bidasoa” co gallo de conmemorar o célebre libro de viaxes do Premio Nobel galego. Previamente, o alumnado participou nunha visita guiada ao renovado museo da Fundación Camilo José Cela.

Román Rodríguez explicou que con esta iniciativa “poñemos en marcha a primeira das rutas literarias relacionadas con este emblemático texto”. E concluíu afirmando que este é “un proxecto novidoso” que axudará á promoción e difusión da obra de Cela, “especialmente dos seus libros de viaxes”.

Seis escenarios de Del Miño al Bidasoa

A ruta dentro do concello padronés sinaliza seis lugares presentes na antedita obra. Nestas placas reprodúcense fragmentos que Cela empregou para describir ou referenciar cada un dos espazos. Desde a entrada en Padrón, pasando pola Taberna do Cuco, o Xardín Botánico, a Igrexa de Santiago e a Casa do escritor Nicasio Pajares, até chegar ao Cemiterio de Adina, onde precisamente repousan os restos de Cela. Neste traxecto percórrense preto de tres quilómetros por importantes escenarios biográficos e literarios do escritor galego.

Desde a Consellería de Cultura e a Fundación Pública Galega Camilo José Cela estase a traballar para que esta iniciativa poida ser extrapolada aos máis de 30 concellos galegos que aparecen no libro e que abranguen desde As Neves (Pontevedra) até Ribadeo (Lugo). Na actualidade, xa está previsto promover rutas similares na contorna de Santiago de Compostela, de Ourense, A Coruña e Ribadeo.

Advertisements

V EDICIÓN DO “LETRESEO. A SEMANA DAS LETRAS NO MUSEO”

Folleto Padrón Literario_portada

A Fundación Pública Galega Camilo José Cela celebra a V edición do Letreseo co que conmemora tres datas fundamentais para a institución: o aniversario do nacemento do escritor (11 de maio), o Día das Letras Galegas (17 de maio) e o Día Internacional dos Museos (18 de maio).

Para celebrar esta “Semana de las Letras en el Museo” levaranse a cabo varias actividades gratuítas e con entrada libre que se poden consultar no seguinte enlace: PADRÓN LITERARIO

Ademais, desde o venres 11 de maio e ata o sábado 19 de maio (ámbolos dous inclusive) haberá xornada de portas abertas, de xeito que a entrada ao Museo e o servizo de guía serán gratuítos calquera día desa semana (os visitantes disporán do servizo de guía ás 12.00 e ás 17.00 h.).

Soamente se require inscrición previa para a visita teatralizada do día 19 de maio co actor Suso Martínez, no correo electrónico visitas@fundacioncela.com ou no número de teléfono 981-81.24.25.

APERTURA DA NOVA EXPOSICIÓN PERMANENTE DO MUSEO CAMILO JOSÉ CELA

Fachada-Casas Canónigos

O vindeiro 14 de febreiro, ás 11,00 h., terá lugar a inauguración da nova exposición permanente na que traballamos nos derradeiros meses.

A entrada ao acto será libre e gratuíta, se ben cómpre CONFIRMAR ASISTENCIA antes do 13 de febreiro, chamando aos teléfonos 981-54.44.05 ou 981-54.44.12, ou enviando un correo electrónico á dirección eventos.culturaeducacion@xunta.es.

Para aqueles que non nos acompañedes ese día,  informámosvos de que durante todo o mes de febreiro a entrada ao museo será gratuíta.

Agardámosvos a todos cos brazos abertos, para compartir connosco a ilusión dun novo museo.

Exposición “CJC, coleccionista: Eu, máis que coleccionar, amontono”

carta-hidalguia_carlos-ii_siglo-xvii

A Fundación Pública Galega Camilo José Cela presenta ao público a súa nova exposición: “Camilo José Cela, coleccionista”, que permanecerá aberta ata o vindeiro 14 de xaneiro de 2017 en Iria Flavia.

Si, máis que coleccionar, amontoo”, estas palabras de Camilo José Cela, publicadas fai un tempo, explican por si soas esta mostra. Durante toda a súa vida o escritor padronés foi coleccionando múltiples obxectos ata acadar un número inxente e heteroxéneo de pezas tan diversas coma curiosas.

Á colección dos seus manuscritos, epistolario, biblioteca, arquivo de prensa, arquivo fotográfico, arquivo audiovisual e pinacoteca hai que engadir varias coleccións menores, entre as que poden atoparse réplicas de placas de rúas, caixas de mistos, caixas de latón, billetes de lotería, moedas, billetes antigos, cromos, selos, bitolas, discos de vinilo e múltiples obxectos que polo raro resultan tremendamente curiosos. Tal é o caso dunha reliquia de San Hilario, dúas pezas dos raís da compañía ferroviaria do avó materno de Cela, John Trulock, ou un azulexo pertencente á casa do escritor Vicente Blasco Ibáñez.

billetes-antiguos

Definía Cela a súa manía de coleccionar do seguinte xeito: “O afán coleccionista, que, segundo os psiquiatras é unha doenza mental de carácter leve e non perigosa, é algo xa tan vello coma o mesmo mundo […] Colecciónase todo ata o máis insospeitado, e, ben mirado, a lista completa de todo o coleccionable tampouco sería unha mala colección”.

E son esas pezas insospeitadas o que se expón na sede de Iria Flavia. Con elas preténdese incidir nunha das facetas máis descoñecidas do escritor padronés: a dun impenitente coleccionista que gardaba todo o que caía nas súas mans, ata o punto de reunir unha amalgama de obxectos de diversa índole.

A exposición poderase visitar de martes a sábado, en horario de 10.00 a 14.00 h. e de 16.00 a 19.00 h.

A exposición “CJC. O Centenario dun Nobel” na Cidade da Cultura

exposicion-centenario-cdc_2

Fotografía: Manuel G. Vicente. Fundación Cidade da Cultura de Galicia

Dende este sábado, 19 de novembro, e ata o 19 de febreiro de 2017, a exposición “Camilo José Cela (1916-2016). O Centenario dun Nobel. Un libro e toda a soidade” chega de terras madrileñas para recalar na Cidade da Cultura no compostelán Monte Gaiás.

A mostra ofrece un percorrido pola vida do escritor galego a través de 600 pezas organizadas cronolóxicamente en 44 seccións. Manuscritos, primeiras edicións das súas novelas máis importantes, obxectos persoais, fragmentos de películas nas que participou como actor, recoñecementos e pezas artísticas axudarán a entender a complexidade dunha das figuras máis extraordinarias do século XX. Sen esquecer a presenza dos tres premios literarios máis salientables cos que foi galardoado Camilo José Cela: o Nobel, o Cervantes e o Princesa de Asturias.

exposicion-centenario-cdc_1

Fotografía: Manuel G. Vicente. Fundación Cidade da Cultura de Galicia

As múltiples facetas do hombre poliédrico que era Camilo José Cela poden rastrexarse de forma clara a través do percorrido expositivo: novelista, dramaturgo, poeta, viaxeiro, académico, editor, pintor, coleccionista, actor… Un personaxe complexo que tivo unha vida intensa nun momento da historia de España caracterizado polos continuos tropezos dos que saía airoso unhas veces, e un pouco trasquilado outras. E é que en España “O que resiste, gaña”.

A exposición, organizada pola Fundación Pública Galega Camilo José Cela, a Fundación Cidade da Cultura de Galicia e Acción Cultural Española, poderáse visitar de martes a domingo, en horario de 10 a 20 h.

A exposición “Compañías convenientes” viaxa a Santiago de Compostela

folleto_afundacionDende o 2 de novembro de 2016 e ata o 15 de xaneiro de 2017, na sede de Afundación en Santiago de Compostela, os visitantes poderán ve-la exposición “Compañías convenientes. Diálogos contemporáneos co home poliedro”, mostra que nos acompañou en Iria Flavia durante todo este verán e que se enmarca dentro dos actos do Centenario do nacemento de Camilo José Cela.

A exposición, comisariada por Paula Cabaleiro e coa asistencia de Íñigo Rodríguez, recolle os traballos de doce artistas contemporáneos que renden homenaxe ao escritor de Padrón a través da interacción das súas pezas con algunhas das obras pertencentes ao legado celiano conservado en Iria Flavia.

Tomando como base a definición de Camilo José Cela “Eu creo que o individuo non é xamais un plano, senon un poliedro”, estes artistas achegáronse á colección de Cela a través da fotografía, a pintura, a escultura, o debuxo, o gravado, a instalación e a vídeocreación para ofrecer unha nova ollada sobre o heteroxéneo universo do escritor padronés.

A exposición poderase visitar na sede Afundación, na compostelana Rúa do Vilar, en horario de luns a domingo, de 12.00 a 14.00 e de 17.00 a 21.00 h.

Programación educativa para o curso 2016-2017

cjc_profesor

Presentámosvos a nova programación educativa que deseñamos para este curso que comeza: 2016-2017. Nela continuamos co achegamento da figura e da obra de Camilo José Cela á comunidade escolar, tanto aos alumnos como aos docentes, dende unha perspectiva lúdica e transversal.

Visitas dinamizadas, obradoiros, proxeccións, valixas didácticas…, toda unha amálgama de actividades para que os centros educativos teñan ao seu dispor toda a información precisa sobre un dos escritores máis destacados da Literatura española e galega da segunda metade do século XX.

Coma tódolos anos, as actividades incluídas na programación educativa son GRATUÍTAS e só cómpre reservar cita previa no teléfono 981-81.24.25 ou no enderezo electrónico visitas@fundacioncela.com.

Lembrámosvos que toda a información sobre esta programación educativa está ao voso dispor no noso blog educativo “Andanzas e desventuras de Camiliño Josesiño“.

Exposición “CJC: 1916-2016. O Centenario dun Nobel. Un libro e toda a soidade”

expo Centenario

Dende o 5 de xullo e ata o 25 de setembro a Biblioteca Nacional de España en Madrid acolle unha nova exposición organizada pola Fundación Pública Galega Camilo José Cela, Acción Cultura Española e a Biblioteca Nacional.

Baixo o título de “CJC:1916-2016. O Centenario dun Nobel. Un libro e toda a soidade”, mais de seiscentas pezas, organizadas  cronolóxicamente seguindo a vida de CJC (1916-2002), amosan ao poliédrico escritor padronés: novelista, articulista, dramaturgo, poeta, académico, editor, pintor, coleccionista, actor, vagabundo… Todas estas personalidades conviven nun espazo que percorre a vida dun dos escritores mais importantes da segunda metade do século XX.

A súa aventura persoal, intelectual, literaria e artística poden observarse dende o manuscrito de A colmena ou a primeira edición de A familia de Pascual Duarte, ata os seus óleos expostos no ano 1947 en Madrid e na Coruña, ou os  seus recoñecimentos, entre os que destacan o premio Nobel, o Cervantes e o Princesa de Asturias. Todo iso sen esquecer o seu Viaxe á Alcarria ou a triloxía de novelas de temática galega: Mazurca para dous mortos, A cruz de San Andrés e Madeira de buxo.

Unna gran mostra que dá conta da enorme personalidade de Camilo José Cela, así coma da súa capacidade de traballo e de todo o legado que deixou en Iria Flavia, para, segundo as súas propias palabras, “devolver a Galicia o moito que Galicia me deu”.

11 de maio de 2016: Actos do Centenario de Camilo José Cela na Fundación

CJC y su madre_1916

O 11 de maio de 1916 nacía en Iria Flavia Camilo José Cela:

“Ás nove e vinte da noite do día 11 de maio de 1916, xoves, vin a este val de bágoas na casa do paso a nivel de Iria Flavia, concello de Padrón, diócese de Santiago de Compostela, provincia da Coruña, banda de estribor da ría de Arousa, alá onde se atopan os ríos Sar e Ulla” (A rosa, 1959).

Por mor deste acontecemento, o vindeiro 11 de maio de 2016 a Fundación Pública Galega Camilo José Cela vístese de gala e conmemora unha data tan especial por todo o alto. Os actos que se celebrarán son gratuitos e abertos a tódolos que desexen acompañarnos na nosa rendida homenaxe. Aquí vos deixamos o listado de actividades:

DEBIDO A UN CAMBIO DE AXENDA, HABERÁ UNHA LEVE VARIACIÓN NO HORARIO DOS ACTOS DA MAÑÁ:

ACTOS DA MAÑÁ:

11:30 – Ofrenda floral polas autoridades na tumba do escritor no Cemiterio de Adina (Iria Flavia).

12:00 – Conferencia “Cela no seu centenario”: no Paraninfo da Fundación, por Luis Iglesias Feijoo, padroeiro da institución.

Actos da tarde:

Acto de clausura do Clube de lectura “Anagnósis”2016, Paraninfo da Fundación.
17:00 – Proxección da curtametraxe “Viaje a la Alcarria”, nominado á mellor curtametraxe nos Goya 2016.
17:30 – Charla coloquio con Tomás Cimadevilla, director da curtametraxe .

Actos da noite:

22:30 – Vídeo-proxección sobre a fachada da Igrexa de Santa María de Adina.
(en caso de choiva, poderáse vela vídeo -proxección dende as fiestras e balcóns da Fundación).

Esta vídeo-proxección poderáse ver tamén os días 12 e 13 de maio ás 22:30.

¡Esperámosvos en Iria Flavia!

V concurso de microrrelatos

Continuando cos actos programados para a conmemoración do Centenario do nacemento de Camilo José Cela, a Fundación convoca a V edición do seu concurso internacional de microrrelatos nas categorías de infantil, xuvenil e adultos. Esta edición presenta un carácter especial conmemorativo e por iso rendirase homenaxe ao libro de memorias infantís do escritor A rosa.

Portada

Esta V edición volve a contar co patrocinio de Ámbito Cultural de “El Corte Inglés” quen, por mor desta edición especial, amplía a dotación dos premios en cada categoría. Os traballos premiados serán publicados en edición dixital pola Fundación e o primeiro premio de cada categoría será obsequiado cunnha tableta dixital e unha tarxeta regalo de El Corte Inglés por valor de 300 €.

Todos os microrrelatos deberanse presentar a través da plataforma web do concurso e deberán comezar co arranque do libro de memorias infantís A rosa –na que o escritor narra as súas primeiras vivencias polas terras de Iria, Vilagarcía, A Coruña, Cangas,Tui e Vigo-: “Mi padre se llama como yo, y yo me llamo como mi hijo…”.

¡Animádevos a participar! Será a mellor homenaxe que poda rendirse ao premio Nobel galego.

http://microrrelatosfcjc.com/