V EDICIÓN DO CONCURSO INTERNACIONAL DE MICROPOEMAS “JOSÉ GARCÍA NIETO”

A Fundación José García Nieto, en colaboración coa Fundación Pública Gallega Camilo José Cela,  ven de convocar o V Concurso de Micropoemas José García Nieto, co gallo de fomentar a creación poética e contribuír á difusión da obra de José García Nieto. Este concurso ten tamén a finalidade de manter viva a lembranza da gran amizade que mantiveron durante máis de cincuenta anos os dous grandes escritores e premios Cervantes Camilo José Cela e José García Nieto.

Se desexas participar, tes toda a información e as bases no seguinte enlace: V Concurso de Micropoemas “José García Nieto”

 

V EDICIÓN DO “LETRESEO. A SEMANA DAS LETRAS NO MUSEO”

A Fundación Pública Galega Camilo José Cela celebra a V edición do Letreseo co que conmemora tres datas fundamentais para a institución: o aniversario do nacemento do escritor (11 de maio), o Día das Letras Galegas (17 de maio) e o Día Internacional dos Museos (18 de maio).

Para celebrar esta “Semana de las Letras en el Museo” levaranse a cabo varias actividades gratuítas e con entrada libre que se poden consultar no seguinte enlace: PADRÓN LITERARIO

Ademais, desde o venres 11 de maio e ata o sábado 19 de maio (ámbolos dous inclusive) haberá xornada de portas abertas, de xeito que a entrada ao Museo e o servizo de guía serán gratuítos calquera día desa semana (os visitantes disporán do servizo de guía ás 12.00 e ás 17.00 h.).

Soamente se require inscrición previa para a visita teatralizada do día 19 de maio co actor Suso Martínez, no correo electrónico visitas@fundacioncela.com ou no número de teléfono 981-81.24.25.

APERTURA DA NOVA EXPOSICIÓN PERMANENTE DO MUSEO CAMILO JOSÉ CELA

O vindeiro 14 de febreiro, ás 11,00 h., terá lugar a inauguración da nova exposición permanente na que traballamos nos derradeiros meses.

A entrada ao acto será libre e gratuíta, se ben cómpre CONFIRMAR ASISTENCIA antes do 13 de febreiro, chamando aos teléfonos 981-54.44.05 ou 981-54.44.12, ou enviando un correo electrónico á dirección eventos.culturaeducacion@xunta.es.

Para aqueles que non nos acompañedes ese día,  informámosvos de que durante todo o mes de febreiro a entrada ao museo será gratuíta.

Agardámosvos a todos cos brazos abertos, para compartir connosco a ilusión dun novo museo.

Reapertura do Museo Camilo José Cela

Na primeira quincena de febreiro a Fundación Pública Galega Camilo José Cela reabrirá as súas portas ao público cun novo discurso museográfico.

O visitante iniciará un percorrido cronolóxico comezando co nacemento do escritor padronés o 11 de maio de 1916 para finalizar co pasamento de Camilo José Cela o 17 de xaneiro de 2002. A través das distintas salas irá coñecendo os fitos máis importantes na vida e na obra do Premio Nobel galego, así coma o inxente legado que doóu a Galicia e que se conserva na sede de Iria Flavia.

Unha das grandes novidades é a incorporación do Museo Ferrocarrileiro John Trulock na propia Fundación: trátase dunha homenaxe ao avó de Cela e á primeira compañía ferroviaria de Galicia, a The West Galicia Railway Company, que facía o traxecto entre Cornes (Santiago de Compostela) e Carril (Pontevedra).

En breve comunicaremos a data da inauguración, que será aberta a tódolos públicos e completamente gratuíta.

Publicación conmemorativa do centenario de Camilo José Cela

Onte presentouse na Cidade de Cultura de Galicia, baixo o título “Camilo José Cela (1916-2016). O centenario dun Nobel. Un libro e toda a soidade”, unha compilación de artigos de distintos autores coa que pretendemos ofrecer unha visión global do autor de Iria Flavia tanto no que se refire á súa traxectoria literaria como persoal.

No acto de presentación do libro, o conselleiro de Cultura e Educación e Presidente do Padroado, Román Rodríguez, asegurou que se trata dunha “obra singular”, na que se reúnen diversos puntos de vista sobre aspectos esenciais da vida e obra de Cela que “ilumina o conxunto da súa existencia e o seu desempeño creativo”.

A publicación recolle a visión de especialistas e intelectuais coma Darío Villanueva, César Antonio Molina, Adolfo Sotelo ou Ernesto Sánchez Pombo. Así mesmo inclúe un apéndice relativo á exposición homónima que tivo lugar na Biblioteca Nacional de España e no Museo Centro Gaiás ao longo de 2016 con motivo do centenario do nacemento de Cela co fin de reforzar o coñecemento da súa figura, da súa obra e do seu legado.

A publicación contou co patrocinio e colaboración da Xunta de Galicia, de Acción Cultural Española, da Biblioteca Nacional de España, da Universidade Camilo José Cela e da Universidade de Barcelona. O libro, de carácter non venal, está a disposición dos interesados nos seguintes enlaces, nos que se pode descargar de xeito totalmente gratuíto:

Libraría da Xunta de Galicia:

https://libraria.xunta.gal/gl/camilo-jose-cela-1916-2016-el-centenario-de-un-nobel-un-libro-y-toda-la-soledad

 

Acción Cultural Española:

http://www.accioncultural.es/es/cjc_2016_centenario_nobel_ebook

Renovación do proxecto museográfico e reapertura do Museo Ferrocarrileiro en Iria Flavia

Prezados amigos,

Nos próximos meses procederemos a renovar o noso proxecto museográfico e reabriremos o Museo Ferrocarrileiro “John Trulock”. Con estes traballos o Museo Camilo José Cela permanecerá pechado pero se tendes visitas concertadas para os próximos meses, informarvos de que estas manteranse nas datas previstas.

Deixámosvos Nota de prensa enviada a medios con máis información ao respecto:

 

A Fundación Cela renovará o proxecto museográfico e reabrirá o Museo Ferrocarrileiro nas súas instalacións de Iria Flavia

Estes traballos de redefinición e mellora comezarán a vindeira semana e durarán ao redor de seis meses durante os cales o Museo Camilo José Cela estará pechado ao público
Santiago, 2 de xuño de 2017

A Fundación Pública Galega Camilo José Cela reorganizará e renovará o proxecto museográfico e reabrirá o Museo ferrocarrileiro ‘John Trulock’ nas súas instalacións de Iria Flavia. En concreto, para recuperar a memoria da primeira liña ferroviaria galega acondicionaranse as dúas salas do Museo Camilo José Cela dedicadas a Viaje a la Alcarria. Estes traballos de redefinición e mellora durarán preto de seis meses durante os cales o Museo dedicado ao autor padronés estará pechado ao público.

Esta medida está vinculada co acordo asinado en maio de 2016 entre a Fundación e o fillo do Nobel, Camilo José Cela Conde, para a execución da sentenza por dereitos de lexítima do mesmo, polo que se lle entrega a Casa nº 8 –onde se sitúa o Museo Ferrocarrileiro ‘John Trulock’– e un total de vinte unha obras de arte.

Así a todo, por acordo das partes, a entrega do material referido no acordo adiábase por un prazo de dez anos, podendo Camilo José Cela Conde solicitar a súa recuperación en calquera momento. Durante este período os bens permanecerían na Fundación co propósito de que se puideran destinar ao cumprimento dos fins fundacionais.

Recentemente, o propio Cela Conde solicitou á Administración autonómica a entrega inmediata dos bens que por lei lle corresponden e desde a Xunta procedeuse a cumprir co acordado. Cómpre aclarar que estas obras de arte, se ben teñen un alto valor patrimonial, non afectan á integridade da colección nin a ningún dos aspectos claves do proxecto museístico no referente ao o legado intelectual, literario, cultural e humano de Camilo José Cela.

Novo convenio con Ferrocarriles Españoles
Na mesma liña, e para non perder unha instalación museística moi querida na comarca, a Fundación Pública Galega Camilo José Cela ven de negociar un novo Convenio coa Fundación de Ferrocarriles Españoles para a integración da meirande parte dos fondos ferroviarios que se atopan no Museo Ferrocarrilero “John Trulock” dentro do propio Museo Camilo José Cela que tamén xestiona á entidade.

Con esta medida a Fundación Pública cumpre, a súa vez, cunha reclamación histórica do Concello de Padrón e integrará dentro do Museo Camilo José Cela un espazo específico no que dar a coñecer a historia do ferrocarril en Galicia moi vinculada tanto á vila que veu nacer ao escritor coma á figura do avó de Camilo José Cela, John Trulock.

A entidade aproveitará esta oportunidade para remodelar e mellorar o percorrido museográfico de Iria Flavia –unha vez rematados os actos conmemorativos do Centenario do nacemento do premio Nobel– modernizando tanto o continente coma o contido do Museo, adaptándoo aos novos públicos, permitindo a visita libre e fomentando o uso das novas tecnoloxías, o que permitirá un novo achegamento á figura do escritor cen anos despois do seu nacemento. En concreto, estas actuacións permitirán renovar o sistema de seguridade das distintas salas e espazos expositivos e eliminar as humidades presentes en diversas salas.

Para a realización de todos estes traballos a entidade padronesa pechará ás súas portas a partires da semana que vén e prevé a apertura das súas novas instalacións de cara a finais deste ano 2017.

Exposición “CJC, coleccionista: Eu, máis que coleccionar, amontono”

A Fundación Pública Galega Camilo José Cela presenta ao público a súa nova exposición: “Camilo José Cela, coleccionista”, que permanecerá aberta ata o vindeiro 14 de xaneiro de 2017 en Iria Flavia.

“Si, máis que coleccionar, amontoo”, estas palabras de Camilo José Cela, publicadas fai un tempo, explican por si soas esta mostra. Durante toda a súa vida o escritor padronés foi coleccionando múltiples obxectos ata acadar un número inxente e heteroxéneo de pezas tan diversas coma curiosas.

Á colección dos seus manuscritos, epistolario, biblioteca, arquivo de prensa, arquivo fotográfico, arquivo audiovisual e pinacoteca hai que engadir varias coleccións menores, entre as que poden atoparse réplicas de placas de rúas, caixas de mistos, caixas de latón, billetes de lotería, moedas, billetes antigos, cromos, selos, bitolas, discos de vinilo e múltiples obxectos que polo raro resultan tremendamente curiosos. Tal é o caso dunha reliquia de San Hilario, dúas pezas dos raís da compañía ferroviaria do avó materno de Cela, John Trulock, ou un azulexo pertencente á casa do escritor Vicente Blasco Ibáñez.

Definía Cela a súa manía de coleccionar do seguinte xeito: “O afán coleccionista, que, segundo os psiquiatras é unha doenza mental de carácter leve e non perigosa, é algo xa tan vello coma o mesmo mundo […] Colecciónase todo ata o máis insospeitado, e, ben mirado, a lista completa de todo o coleccionable tampouco sería unha mala colección”.

E son esas pezas insospeitadas o que se expón na sede de Iria Flavia. Con elas preténdese incidir nunha das facetas máis descoñecidas do escritor padronés: a dun impenitente coleccionista que gardaba todo o que caía nas súas mans, ata o punto de reunir unha amalgama de obxectos de diversa índole.

A exposición poderase visitar de martes a sábado, en horario de 10.00 a 14.00 h. e de 16.00 a 19.00 h.

A exposición “CJC. O Centenario dun Nobel” na Cidade da Cultura

Fotografía: Manuel G. Vicente. Fundación Cidade da Cultura de Galicia

Dende este sábado, 19 de novembro, e ata o 19 de febreiro de 2017, a exposición “Camilo José Cela (1916-2016). O Centenario dun Nobel. Un libro e toda a soidade” chega de terras madrileñas para recalar na Cidade da Cultura no compostelán Monte Gaiás.

A mostra ofrece un percorrido pola vida do escritor galego a través de 600 pezas organizadas cronolóxicamente en 44 seccións. Manuscritos, primeiras edicións das súas novelas máis importantes, obxectos persoais, fragmentos de películas nas que participou como actor, recoñecementos e pezas artísticas axudarán a entender a complexidade dunha das figuras máis extraordinarias do século XX. Sen esquecer a presenza dos tres premios literarios máis salientables cos que foi galardoado Camilo José Cela: o Nobel, o Cervantes e o Princesa de Asturias.

Fotografía: Manuel G. Vicente. Fundación Cidade da Cultura de Galicia

As múltiples facetas do hombre poliédrico que era Camilo José Cela poden rastrexarse de forma clara a través do percorrido expositivo: novelista, dramaturgo, poeta, viaxeiro, académico, editor, pintor, coleccionista, actor… Un personaxe complexo que tivo unha vida intensa nun momento da historia de España caracterizado polos continuos tropezos dos que saía airoso unhas veces, e un pouco trasquilado outras. E é que en España “O que resiste, gaña”.

A exposición, organizada pola Fundación Pública Galega Camilo José Cela, a Fundación Cidade da Cultura de Galicia e Acción Cultural Española, poderáse visitar de martes a domingo, en horario de 10 a 20 h.

A exposición “Compañías convenientes” viaxa a Santiago de Compostela

Dende o 2 de novembro de 2016 e ata o 15 de xaneiro de 2017, na sede de Afundación en Santiago de Compostela, os visitantes poderán ve-la exposición “Compañías convenientes. Diálogos contemporáneos co home poliedro”, mostra que nos acompañou en Iria Flavia durante todo este verán e que se enmarca dentro dos actos do Centenario do nacemento de Camilo José Cela.

A exposición, comisariada por Paula Cabaleiro e coa asistencia de Íñigo Rodríguez, recolle os traballos de doce artistas contemporáneos que renden homenaxe ao escritor de Padrón a través da interacción das súas pezas con algunhas das obras pertencentes ao legado celiano conservado en Iria Flavia.

Tomando como base a definición de Camilo José Cela “Eu creo que o individuo non é xamais un plano, senon un poliedro”, estes artistas achegáronse á colección de Cela a través da fotografía, a pintura, a escultura, o debuxo, o gravado, a instalación e a vídeocreación para ofrecer unha nova ollada sobre o heteroxéneo universo do escritor padronés.

A exposición poderase visitar na sede Afundación, na compostelana Rúa do Vilar, en horario de luns a domingo, de 12.00 a 14.00 e de 17.00 a 21.00 h.

Programación educativa para o curso 2016-2017

Presentámosvos a nova programación educativa que deseñamos para este curso que comeza: 2016-2017. Nela continuamos co achegamento da figura e da obra de Camilo José Cela á comunidade escolar, tanto aos alumnos como aos docentes, dende unha perspectiva lúdica e transversal.

Visitas dinamizadas, obradoiros, proxeccións, valixas didácticas…, toda unha amálgama de actividades para que os centros educativos teñan ao seu dispor toda a información precisa sobre un dos escritores máis destacados da Literatura española e galega da segunda metade do século XX.

Coma tódolos anos, as actividades incluídas na programación educativa son GRATUÍTAS e só cómpre reservar cita previa no teléfono 981-81.24.25 ou no enderezo electrónico visitas@fundacioncela.com.

Lembrámosvos que toda a información sobre esta programación educativa está ao voso dispor no noso blog educativo “Andanzas e desventuras de Camiliño Josesiño“.